ما مرتاح طبعاً والحچي ميفيد
وبعد ما ظل صبر كافي الصبرته
بالحب تختلف مااختلف وياك
بس عوض كَلب مني الاخذته
مليت انتظر باچر تجي وما جاي
عكَب باچر اجه وما جيت انته !؟
واسهر والسهر ريشه ابمهب الريح
واحس حتى الكَمر عاتبني سكته
وكَلي اشحصلت من عمري ذاك الفات
اذا نص العمر لجلك سهرته
واذا بيه الذنب فهمني خل ارتاح
واذا بيك الذنب رغماً قبلته
يحسدونه شكَثر حسبونه عالعشاكَ
ويكَلولي شكثر من عدنه بكَته
وكَتلهم چذب بس بالاسم محبوب
ومتندم على يوم العرفَته
لأن طبع اليحب معروف عندالناس
صافن والحچي كله ابصفنته
وانت لا تحن لا مثلي هم تشتاكَ
وقانون العشكَ وحدك عزفته
موهيچ اليحب كَلب اليحب ولهان
ولا كَلب اليحب هم هيچ دكَته
كل ساعه احتركَ طافيني دمع العين
وترجع حضرتك ثاني وشعلته
ومثل عالم صرت بس تخترع اعذار
ولعلمك نعم هسه افتهمته
بستانك حزن منه جنيت اهموم
ماجاني الفرح لايوم ضكَته
كافي بطلت رجعلي كَلبي النوب
مااريد العشكَ ماعندي بخته
وباچر لا تجي ودكَ على الباب
مفتاحك لأن اصلاً كسرته
وتتندم علي تحلم تردلي بيوم
وخط رجعه چذب سولفهه نكَته
وازيدك بالشعر بيتين مو بس بيت
البومك للصور بيدي حركَته
ورسمك لو طفل والعين امه اتصير
من عيني بعد صدكَ فطمته !!
وخسران اعترف والحب تجاره صار
وبايع مشتري كل شي خسرته
بس ابقه القلم وانت الورق جوّاي
وبكيفي الاريده والشطبتهإذا حسيت آني امفارگك يوم..
إذا حسيت آني امفارگك يوم
تعال وشوف بفراگك شاعاني
وإذا دمعات عينك تنزل ابشوگ
آنا ماضل دمع حتى ابچي ثاني
خلص دمعي وبچيت ابمي العيون
لان اعرف بعد يمك مكاني
أمنيتك تصيح ابصوت أهواك
لان مخلص واعرفك مو أناني
أمنيتك تلمني بحضنك اليوم
وگبل باچر لان رابي ابحناني
لان تعرفني طيب وعشكك موت
رغم غصبا عليه البعد آني
فارگنه الوكت والقسمه والناس
وبقت ذكراتنه اتلحن أغاني
أغاني شگد حزينه اتبچي جلاد
بس امسح دموعك لا تعاني
البس بدلتك وتحنه للناس
وفل شعرك على اعناد الأماني
وما أريدك تلوم ابگلبك الصار
ولا تكول ابتعد عني ونساني
صدگني احبك رغم ما راح
كل الي جنت گاعد اتاني
خليني وحيد آبين ذكراك
وصيح من الزمن آه يا زماني
صح اترك مكان ابگلبك اليوم
بس يكفيك ما صار وكفاني
اتعايش حبيبي ابوقتك الجاي
افرح وضحك وكود التهاني
آلف مبروك واني الي يهنيك
وخليلك شمع فوك الصواني
إذا ضنك ابطل ساعة ذكراك
أرد ارجع واذكرك عل ثواني
